د افغان کرکټ د مینه‌والو کورEnglish ↗
افغان اتلان
کورپاڼه خبرونه

عمري: د عمومي عفوې سرغړوونکي به عدلي تعقیب ته وسپارل شي

افغان اتلان · پښتو
تازه خبرونه — Afghan Atalan

د کورنیو چارو وزارت لومړي مرستیال محمد نبي عمري ویلي، هغه کسان چې د اسلامي امارت د عمومي عفوې له فرمانه سرغړونه کوي او له خلکو غچ اخلي، باید له قانوني چلند سره مخ شي. نوموړي ټینګار کړی چې د عفوې له اعلان وروسته انتقام اخیستل د مشرانو له لارښوونو څخه سرغړونه ده.

عمري دا څرګندونې د پکتیکا د نوي والي مهرالله حماد د معرفۍ په مراسمو کې کړې دي. هغه د اسلامي امارت له غړو غوښتي چې له غچ اخیستنې ډډه وکړي او ویلي یې دي، د عمومي عفوې له فرمانه سرغړوونکي به محاکمه شي.

د کورنیو چارو وزارت مرستیال د عفوې له فرمان وروسته د پخوانیو مخالفینو پر وړاندې د شخصي انتقام اخیستل ناسم عمل بللی او د اسلامي امارت غړو ته یې ویلي چې د دغه فرمان درناوی وکړي. نوموړي دغه غوښتنه د مشرانو د امرونو د پلي کېدو له اړتیا سره تړلې ده.

په مراسمو کې نوي والي مهرالله حماد د دولتي ادارو ترمنځ پر همغږۍ، ګډ کار او مشورو ټینګار وکړ. هغه وویل، د نظام پیاوړتیا او ساتنه د ټولو ادارو او مسوولینو ګډې همکارۍ ته اړتیا لري او یوازې یو کس نه شي کولی ټول کارونه پر مخ یوسي.

د پکتیکا پخواني والي عبدالخالق عابد له سیمه‌ییزو مسوولینو وغوښتل چې له نوي والي سره په درناوي، یووالي او همغږۍ کار وکړي او د هغه اطاعت وکړي. نوموړي دا غوښتنه د اسلامي امارت د مشر د لارښوونو او د الله تعالی د حکم پر بنسټ مطرح کړه.

د اسلامي امارت د مشر د حکم له مخې، مهرالله حماد د پکتیکا او عبدالخالق عابد د پکتیا د والي په توګه ټاکل شوي دي. دواړو چارواکو د یکشنبې په ورځ په خپلو نویو ولایتونو کې په رسمي ډول خپلې دندې پیل کړې.