د افغان کرکټ د مینه‌والو کورEnglish ↗
افغان اتلان
کورپاڼه خبرونه

رباب فاطمه په کابل کې د یوناما د مشرې په توګه کار پیل کړ

افغان اتلان · پښتو
رباب فاطمه په کابل کې د یوناما د مشرې په توګه کار پیل کړ

د بنګله‌دېش پخوانۍ ډیپلوماته رباب فاطمه کابل ته رسېدلې او د افغانستان لپاره د ملګرو ملتونو د سرمنشي د ځانګړې استازې او په افغانستان کې د ملګرو ملتونو د مرستندوی پلاوي (یوناما) د مشرې په توګه یې کار پیل کړی دی.

یوناما د یکشنبې په ورځ په یوه خبرپاڼه کې ویلي چې فاطمه د دې نړیوال سازمان د سرمنشي د ځانګړې استازې په توګه هم دنده ترسره کوي. د هغې د کار پیل په داسې مهال کېږي چې یوناما په افغانستان کې د ملګرو ملتونو د فعالیتونو او مرستندویو هڅو د همغږۍ مهم مسؤلیت لري.

د خبرپاڼې له مخې، رباب فاطمه په ملي او نړیواله کچه د عامه خدمتونو په برخو کې تر ۳۰ کلونو ډېره تجربه لري. هغې په دوه‌اړخیزه او څو اړخیزه ډیپلوماسۍ، د پالیسۍ جوړولو او د پروګرامونو د طرحې او عملي کولو په برخو کې هم کار کړی دی.

فاطمې تر دې مخکې د ملګرو ملتونو د سرمنشي د مرستیالې او د لږ پرمختللو او په وچه کې د راګېر هېوادونو په چارو کې د دغه سازمان د استازې په توګه دنده ترسره کړې ده. دا مسؤلیتونه د نړیوالو او پراختیايي موضوعاتو په برخه کې د هغې د کاري سابقې یوه برخه جوړوي.

هغې له ۲۰۱۹ څخه تر ۲۰۲۲ کال پورې په ملګرو ملتونو کې د بنګله‌دېش د سفیرې او دایمي استازې په توګه دنده ترسره کړې ده. تر دې وړاندې، له ۲۰۱۶ څخه تر ۲۰۱۹ کال پورې په جاپان کې د بنګله‌دېش سفیره وه.

د یوناما په خبرپاڼه کې د فاطمې د راتلونکو لومړیتوبونو په اړه نور جزئیات نه دي ورکړل شوي؛ خو نوموړې به د خپل نوي ماموریت له مخې په افغانستان کې د ملګرو ملتونو د پلاوي مشري کوي.