د ایکو په غونډه کې د افغانستان د رېل پټلۍ پروژې او سیمهییز اتصال څېړل کېږي

د افغانستان د اوسپنېپټلۍ ادارې عمومي رییس عبدالکریم فاتح د یوه تخنیکي پلاوي په مشرۍ قزاقستان ته روان شوی، څو د اقتصادي همکاریو ټولنې «ایکو» په سیمهییزه غونډه کې ګډون وکړي.
د اوسپنېپټلۍ ادارې د معلوماتو له مخې، ټاکل شوې ده چې فاتح په دې غونډه کې د افغانستان د رېل پټلۍ د اوسني وضعیت، روانو پروژو او راتلونکو پلانونو په اړه خبرې وکړي.
د غونډې په څنډه کې به د افغانستان پلاوی د ایکو د غړیو هېوادونو له استازو سره د سیمهییز اتصال، سوداګرۍ، ټرانزیټ او اقتصادي همکاریو د پراختیا په اړه هم بحثونه وکړي.
افغانستان په سیمه کې د رېل پټلۍ د شبکې له لارې د سوداګریزو دهلېزونو، ټرانزیټ او اقتصادي اړیکو د پیاوړتیا لپاره د همکاریو پراختیا مهمه بولي. د ادارې د معلوماتو پر بنسټ، د افغانستان د اوسپنېپټلۍ روانې پروژې او راتلونکي پلانونه به د غونډې له مهمو موضوعاتو څخه وي.
تمه ده چې د افغانستان ګډون د ایکو د غړیو هېوادونو ترمنځ د رېل پټلۍ په برخه کې د ګډو همکاریو، د پانګونې د فرصتونو او د سیمهییز اتصال د پیاوړتیا لپاره د بحث زمینه برابره کړي.