فایق: د طالبانو تبعیضي تګلارې له اسلام او افغاني کلتور سره په ټکر کې دي

په ملګرو ملتونو کې د افغانستان استازي نصیراحمد فایق ویلي چې په افغانستان کې د طالبانو تبعیضي او محدودوونکې تګلارې له اسلام او اصیل افغاني کلتور سره په مستقیم ټکر کې دي او باید د دغو ارزښتونو استازیتوب ونه کړي.
فایق د عقیدې او دین پر آزادۍ د لګېدلو محدودیتونو په اړه جدي اندېښنه څرګنده کړې ده. نوموړي د شیعهګانو، هزارهګانو او اسماعیلیانو په ګډون د مذهبي او قومي لږکیو پر وړاندې شته تبعیض هم یاد کړی دی.
هغه ویلي چې د سختدریځو دیني تعبیرونو پر بنسټ د نجونو او ښځو له زدهکړو، کار او ټولنیز ژوند څخه محرومول د توجیه وړ نه دي. د فایق په وینا، نه اسلام او نه هم افغاني کلتور د ظلم، تبعیض او د بنسټیزو بشري حقونو د سلبولو اجازه ورکوي.
فایق زیاته کړې چې د طالبانو روانې کړنې او پالیسۍ له عدل، انساني کرامت او د علم او پوهې له ترلاسه کولو سره په بشپړ ډول تضاد لري.