د سالنګ شمالي برخې د بیارغونې چارې په یوه میاشت کې بشپړېږي

د سالنګ لویې لارې په شمالي برخه کې د بیارغونې چارې په چټکۍ روانې دي او د قراردادي شرکت مسوولین وايي، د پنځه کیلومتره برخې پاتې کارونه به په راتلونکې یوه میاشت کې بشپړ شي.
د پروژې انجنیر رحمتالله ویلي، په شمالي سالنګ کې د سړک د کانکرېټ اچولو چارې روانې دي او له هغې وروسته به د اسفالټ څو پړاوونه ترسره شي. د هغه په وینا، د پروژې په وروستي پړاو کې به پر سړک کریړ واچول شي.
د ټولګټو وزارت ویاند محمد اشرف حقشناس وايي، د شمالي سالنګ ترڅنګ د دې لارې په سویلي برخو کې هم د بیارغونې کارونه دوام لري. په شمالي برخه کې د سړک اسفالټ، د ګولایانو کانکرېټ او د استنادي دېوالونو جوړول شامل دي.
د وزارت د معلوماتو له مخې، په سویلي سالنګ کې کارونه په دوو برخو وېشل شوي دي. په لومړۍ برخه کې له تونل څخه تر دهن اولنګ پورې د ۱۲ کیلومتره سړک د کریړ اچولو بهیر روان دی، او په دویمه برخه کې له دهن اولنګ څخه تر جبلالسراج پورې د لارې د بیارغونې چارې دوام لري.
حقشناس ویلي، وزارت هڅه کوي چې د سالنګونو د بیارغونې پاتې کارونه د ژمي له پیل وړاندې بشپړ کړي. د شمالي سالنګ قراردادي شرکت هم تمه ښودلې چې د خپلې پنځه کیلومتره برخې ټول کارونه به په نږدې یوه میاشت کې پای ته ورسوي.
موټرچلوونکي د سالنګ لارې د بیارغونې هرکلی کوي، خو وايي چې د کارونو چټک بشپړېدل د دوی لپاره مهم دي. د دوی په وینا، د سړک خرابوالي مخکې موټرو ته زیان اړاوه او د تګ راتګ ستونزې یې زیاتولې، خو د کارونو له پیل وروسته د لارې وضعیت تر یوه بریده ښه شوی دی.
د موټرچلوونکو په باور، د دې پروژې بشپړېدل به د سالنګ پر لویه لار د سفر اسانتیاوې ډېرې او د لارې د بندېدو او نورو تګ راتګ ستونزې کمې کړي.