د افغان کډوالو له ستنېدو وروسته په کوټه کې «وړوکی افغانستان» له اقتصادي سوړوالي سره مخ دی

د پاکستان د بلوچستان ایالت د کوټې ښار په غوثآباد سیمه کې هغه بازار، چې د افغان کډوالو د ګڼ حضور له امله د «وړوکي افغانستان» په نوم مشهور و، د افغانانو له ستنېدو وروسته له کمزورې سوداګرۍ سره مخ شوی دی. د سیمې دوکانداران وايي، د پېرېدونکو شمېر کم شوی او د بازار پخوانی رونق له منځه تللی دی.
په دې بازار کې افغاني دودیز خواړه، جامې، د ورځني ژوند توکي او نور محصولات پلورل کېدل. افغان کډوال به دلته د اړتیا وړ توکو تر اخیستو سربېره له خپلو هېوادوالو سره د لیدنې لپاره هم راټولېدل. د دوی له کمېدو سره د دوکانونو، هوټلونو او په ځانګړي ډول د افغاني خوړو د پلورنځیو کاروبار اغېزمن شوی دی.
د غوثآباد اوسېدونکي حبیبالله ازادۍ راډیو ته ویلي، پخوا په سیمه کې ګڼ افغان کډوال اوسېدل او د هغوی پېر او پلور د بازار د فعالیت مهمه برخه وه. د هغه په وینا، د کډوالو له تلو وروسته کاروبارونه کم شوي او د کورونو او ځمکو ارزښت هم راټیټ شوی دی. نوموړي ادعا کړې چې یو کور، چې مخکې په یوه کروړ پاکستانۍ روپۍ پلورل کېده، اوس شاوخوا په شلو لکو روپیو موندل کېږي.
د بازار یو دوکاندار حاجي سخي، چې وايي له ۴۵ کلونو راهیسې په غوثآباد کې کاروبار کوي، وایي د کډوالو د ستنېدو له پیل سره یې د دوکان عواید کم شوي دي. هغه همداراز د لوړو بیو او د کرایې له زیاتوالي شکایت کړی او ویلي یې دي چې د سیمهییزو خلکو اقتصادي حالت هم خراب شوی دی.
بل کاروباري، شاه محمد، چې د هغه په وینا شاوخوا ۴۰ کاله کېږي په دغه بازار کې کار کوي، وايي د سیمې د ډېرو خلکو عاید له افغانستان او ایران سره پر سوداګرۍ او د پولو پر تګ راتګ ولاړ دی. هغه ادعا کوي چې د کډوالو له ستنېدو، د سوداګرۍ له کمېدو او د لارو له تړل کېدو وروسته د دوی کاروبارونه له سخت رکود سره مخ شوي دي.
د غوثآباد د کاروباریانو شکایتونه په داسې مهال مطرح کېږي چې له پاکستانه افغانستان ته د افغان کډوالو د ستنېدو بهیر دوام لري. د کډوالۍ نړیوال سازمان د معلوماتو له مخې، د ۲۰۲۳ کال د سپټمبر له ۱۵مې څخه د ۲۰۲۶ کال د جون تر ۱۵مې پورې دوه میلیونه او ۵۰۷ زره افغانان له پاکستانه افغانستان ته ستانه شوي؛ په دې شمېر کې په خپله خوښه ستانه شوي او ایستل شوي کسان دواړه شامل دي.
دغه سازمان ویلي، یوازې د ۲۰۲۶ کال د جون په لومړیو ۱۵ ورځو کې ۵۸ زره او ۴۶۹ افغانان افغانستان ته ستانه شوي دي. بل لوري ته، د ملګرو ملتونو د کډوالو عالي کمېشنرۍ د معلوماتو له مخې، د ۲۰۲۶ کال له پیل څخه د اکتوبر تر درېیمې پورې ۷۱۵ زره او ۴۰۰ افغانان له پاکستانه افغانستان ته تللي دي. د دواړو ادارو شمېرې د بېلابېلو وختونو او معلوماتي مودهوو لپاره وړاندې شوې دي.