شمائله سلیمي

ژوند سره به اړوې ځان رنګ په رنګ

وینې خو جانانه جهان رنګ په رنګ
هر چاته په هر رنګ کې ګویا دي څوک

بویه لامکان او مکان رنګ په رنګ
ستا د مینې رنګ مې پکې ونه موند

اړوم د مینې داستان رنګ په رنګ
تا سره به هر وخت کې ولاړ وي وخت

زده دې څيرول د ګرېوان رنګ په رنګ
لاس دې په خوله ایښی مجبورۍ ګنې

چیغې دې راځي د وجدان رنګ په رنګ
کوم د قربت رنګ دې ځان نه تاوو کړمه

ګرځي دې کوڅه کې سګان رنګ په رنګ
وینم شمائلې، رنګینۍ چې اوس

را دې شي د مینې ارمان رنګ په رنګ

پاڼې دې مه غوړوه، ګله په دې

غم مې د زړه کمېږي کله په دې
چې تر اخيره به احساس نکړې ما

زه پوهېدمه، له اوله په دې
تا ته چې خاندي اوس په کوم يو عادت

ما نه خفه شو، څو څو ځله په دې
دي په دې لار کې، د نغمو قاتلان

پام کوه مه راځه، بلبله په دې
کومې خبرې چې اشنا کړئ تاسو

موږ بېګانه شوو، يو تر بله په دې
ستا ارادې چې دم په دم بدلېږي

تګ نا ممکن دى، تر منزله په دې
زړه دې خواستګار د شمائلې نه ٶ

خپله ګناه اچوې، څله په دې