افغانستان د برازیل د شپږاړخیز فوټسال جام نیمهپایلوبې ته ووت

د افغانستان د فوټسال ملي لوبډلې د پېرو پر وړاندې په درې پر صفر بریا سره د برازیل د شپږاړخیز جام نیمهپایلوبې ته لار وموندله. افغان لوبډله د خپلې ډلې د مخکښې لوبډلې په توګه له دې پړاو سره یوځای شوه.
افغانستان به د نیمهپایلوبې په لوبه کې له کیپورډ سره مخامخ شي. ټاکل شوې دا سیالي د یکشنبې په سهار، د افغانستان پر وخت، ترسره شي. د کیپورډ لوبډله د لومړۍ ډلې برخه ده، چې برازیل او اندونیزیا هم پکې شامل دي.
افغان لوبډلې د سربیايي روزونکي دژان ددیوویچ تر لارښوونې لاندې د پېرو پر وړاندې لوبه له چټک برید سره پیل کړه. اکبر کاظمي د افغانستان لومړی ګول وواهه، ورپسې سید مرتضی حسيني د لومړۍ نیمایي په وروستیو شېبو کې دویم ګول ورزیات کړ. د نیمایي له پای ته رسېدو وړاندې رضا حسينيپور درېیم ګول هم وواهه او افغانستان د درې پر صفر برترۍ سره دمې ته ولاړ.
پېرو په دویمه نیمایي کې د پایلې د بدلولو لپاره د «پاور پلی» له سیستم څخه کار واخیست او د افغانستان پر دروازه یې پرلهپسې بریدونه وکړل. خو افغان ګولساتونکي جواد صفري څو مهم توپونه ونیول او اجازه یې ورنه کړه چې د پېرو لوبډله ګول وکړي. په پاتې وخت کې دواړو خواوو نور ګول ونه واهه او لوبه هماغه درې پر صفر پای ته ورسېده.
افغانستان له دې بریا سره څلور امتیازه شول او د دویمې ډلې لومړی مقام یې خپل کړ. افغان لوبډلې تر دې مخکې له جاپان سره بېګوله مساوي کړې وه، چې د پېرو پر وړاندې بریا یې د نیمهپایلوبې لپاره بسیا کړه.
د برازیل شپږاړخیز جام د اکتوبر له ۱۲مې تر ۱۸مې نېټې پورې په برازیل کې ترسره کېږي. په دې سیالیو کې شپږ لوبډلې ګډون لري او په دوو درېکسیزو ډلو وېشل شوې دي. د افغانستان د لوبډلې تخنیکي مدیر جواد اصغري مقدم ویلي، لوبډله یې له کیپورډ سره د نیمهپایلوبې لپاره بشپړه چمتو ده او هیله لري چې پایلوبې ته ورسېږي او هلته له کوربه برازیل سره ولوبېږي.