د افغان کرکټ د مینه‌والو کورEnglish ↗
افغان اتلان
کورپاڼه خبرونه

په پېښور کې افغانستان ته د دیني کتابونو لېږد ډېر شوی، د پښتو ادبیاتو بازار کمزوری شوی

افغان اتلان · پښتو
تازه خبرونه — Afghan Atalan

په پېښور کې د کتابونو کاروباریان وايي، افغانستان ته د دیني اثارو غوښتنه د طالبانو له بیا واکمنېدو وروسته زیاته شوې، خو د پښتو ادبیاتو او شعرونو د کتابونو بازار ورسره کمزوری شوی دی. د دوی په وینا، د سوداګریزو لارو تړل کېدو، د لېږد د بیو لوړېدو او په افغانستان کې اقتصادي ستونزو د کتابونو پر سوداګرۍ دروند اغېز کړی دی.

د پېښور د جنګي محلې د اسلامي کتابونو د کاروباریانو د اتحادیې مشر نور حلیم خان ازادي راډیو ته ویلي، افغانستان ته اوس د قرآن کریم، سپارو، حدیثو، فقهې او سیرت کتابونو د لېږلو غوښتنه ډېره شوې ده. هغه وايي، دا غوښتنه په ځانګړي ډول د دیني مدرسو له لوري زیاته شوې ده.

د نور حلیم خان په خبره، د پخواني جمهوري حکومت پر مهال به افغانستان ته هره میاشت شاوخوا دوه یا درې کانټینره کتابونه لېږل کېدل، خو د کتابونو ډول یې له اوسني وضعیت سره توپیر درلود. هغه وايي، په هغه وخت کې د پښتو شعرونو او ادبیاتو کتابونه ښه بازار درلود، په داسې حال کې چې د اسلامي کتابونو غوښتنه محدوده وه.

نوموړي زیاته کړې چې د تورخم او نورو سوداګریزو لارو له تړل کېدو وروسته د کتابونو لېږد له ستونزو سره مخ شوی دی. د هغه په وینا، اوس ځینې باروړونکي موټرونه د ایران له لارې افغانستان ته ځي چې د تګ راتګ او ترانسپورټ لګښتونه یې ډېر لوړ دي. د همدې اضافي لګښتونو له امله کتابونه په لوړه بیه تمامېږي او پېرودونکي یې د پخوا په څېر په اسانه نه شي اخیستلای.

د کتابونو پلورونکي وايي، د لېږد له لګښتونو سره یوځای د مالیو زیاتوالي هم د اثارو بیې لوړې کړې دي. دوی باور لري چې په افغانستان کې د خلکو د اقتصادي توان کمېدو د کتابونو پر پېرلو هم اغېز کړی او د دیني کتابونو د غوښتنې له زیاتېدو سره سره، عمومي سوداګري له ګڼو خنډونو سره مخ ده.

د پښتو کتابونو چاپوونکی او پلورونکی ایازالله ترکزی وايي، پخوا به یې افغانستان ته د پښتو ادبیاتو او شعرونو کتابونه په پراخه کچه لېږل، خو اوس یې خرڅلاو کم شوی دی. هغه ادعا کوي چې د نجونو پر زده کړو محدودیتونو او پر ځینو کتابونو بندیزونو د دې اثارو پر بازار اغېز کړی دی.

ترکزي ویلي، د ځینو کتابونو پلورنځي څارل کېږي او هغه اثار هم له محدودیتونو سره مخ دي چې د شاعرانو او لیکوالانو انځورونه پکې شامل وي. د هغه په وینا، همدې وضعیت د پښتو ادبیاتو د ځینو کتابونو چاپ او افغانستان ته د هغوی لېږد راکم کړی دی.

د پېښور کتاب پلورونکي وايي، د دیني کتابونو د غوښتنې زیاتوالی ورته د کار نوي فرصتونه برابروي، خو د افغانستان او پاکستان ترمنځ د سوداګریزو لارو پرانیستل کېدل به د لېږد لګښتونه او د کتابونو بیې راکمې کړي. دوی هیله لري چې لارې بېرته پرانیستل شي او د دواړو هېوادونو ترمنځ د کتابونو سوداګري اسانه شي.