د سلاموطندار راډیو له ډلې یو شمېر خبریالان او کارکوونکي بېبرخې شوي

په افغانستان کې د رسنیو د مالي ستونزو له دوام سره، سلاموطندار راډیو د خبریالانو، پروډیوسرانو او خدماتي برخو په ګډون یو شمېر کارکوونکي له دندو ګوښه کړي دي. د دغې رسنۍ کارکوونکي وايي، دا اقدام د اقتصادي فشارونو په لړ کې شوی، خو ادارې یې تر اوسه د پرېکړې په اړه رسمي وضاحت نه دی ورکړی.
د سلاموطندار راډیو خبریال او اېډېټر عمران رحیمي ازادي راډیو ته ویلي، چې ده او یو شمېر همکارانو یې د سپټمبر پر ۳۰مه د برېښنالیک له لارې د دندو د پای ته رسېدو خبر ترلاسه کړ. د هغه په وینا، له لسو ډېر کسان له دندو لرې شوي او د کارکوونکو کمښت یوازې د خبرونو تر څانګې محدود نه و، بلکې د پخلنځي او نورو خدماتي برخو کارکوونکي هم پکې شامل وو.
رحیمي، چې شاوخوا اووه کاله یې له دغې رسنۍ سره کار کړی، ویلي چې د دندې له لاسه ورکول ورته دردوونکي وو. د سلاموطندار یوه بل پخواني خبریال، چې د موضوع د حساسیت له امله یې نه غوښتل نوم یې واخیستل شي، ویلي چې په افغانستان کې ګڼې رسنۍ له اقتصادي ستونزو سره مخ دي او له هغو نړیوالو بنسټونو یې د پاملرنې غوښتنه کړې چې د رسنیو او خبریالانو د ملاتړ ادعا کوي.
ازادي راډیو وايي، د سلاموطندار له مسوولانو سره یې د نظر اخیستو لپاره اړیکه نیولې وه، خو د راپور تر خپرېدو پورې یې ځواب نه و ترلاسه کړی. د رسنۍ ادارې هم تر اوسه په رسمي ډول نه دي ویلي چې د کارکوونکو د ګوښه کولو مشخص دلیل څه دی.
د رسنیو د چارو د کارپوهانو په باور، د بهرنیو مرستو کمېدل او د اعلانونو د عوایدو له منځه تلل د دې وضعیت له مهمو لاملونو څخه دي. د افغانستان د خبریالانو د ملاتړ بنسټ مشر حامد عبیدي ویلي، ډېری فعالې رسنۍ پر نړیوالو مرستو تکیه لري، خو د مرستو او اعلانونو د عوایدو له کمېدو سره یې مالي فشارونه زیات شوي دي. هغه احتمال ښودلی چې د سلاموطندار د کارکوونکو د ګوښه کېدو تر شا هم ورته ستونزې وي.
د کارکوونکو په وینا، د منظم معاش نشتوالی او د کاري فرصتونو کمښت د رسنیز کار پر وړاندې جدي خنډونه دي. یوې افغانې خبریالې ویلي، ښځینه خبریالانې د اقتصادي ستونزو ترڅنګ له کاري محدودیتونو او د ملاتړ له نشتوالي سره هم مخ دي. د افغانستان د ازادو ژورنالېستانو ټولنې د ۲۰۲۶ کال په فبرورۍ کې ویلي وو چې په هېواد کې ۳۹۴ راډیوګانې فعالې دي او نږدې درې زره کسان پکې کار کوي، خو له نیمایي ډېر کارکوونکي، په ځانګړي ډول په سیمهییزو رسنیو کې، رضاکارانه فعالیت کوي. نړیوالې شمېرې بیا ښيي چې د ۲۰۲۲ کال تر فبرورۍ پورې له ۶۲۳ فعالو رسنیو څخه تر نیمایي ډېرې تړل شوې وې.