اف بلا وختونه تېر شول
لكه سيورى راسره يې
ته پر ما نه، زه پر تا باندې مين يم
چې پېرزو د څښتن وشي او يو څو غيرانه راكړي
زه هغه پر تا مصرف كړم
په پيسو باندې دې واخلم
نو بيا ټول واك دې زما شي
خپلې شونډې پر تا كېږدم
شپه او ورځ كې دې څو وارې ښكلومه
چې دې څومره ښكلومه
ستا ژوندون هومره لنډېږي
زما بدن هومره دردېږي
ته زما لاس كې ايره شې
زه د وخت لاس كې ايره شم
زما او ستا توپير نو څه دى!
ته سګريټ زما لپاره
زه سګريټ د زمانې يم

۲۳- ۳- ۱۳۸۴ لمريز
بلخ پوهنتون