افغان لوبډله د بنګلهدېش پر وړاندې د درېیم ټیسټ لپاره چمتووالی نیسي
د افغانستان کرکټ ملي لوبډله په ابوظهبي کې د بنګلهدېش پر وړاندې د ټیسټ سیالۍ لپاره چمتووالی نیسي او د سیالۍ له پیلېدو مخکې یې تمرینونه روان دي.
د رحمت شاه په مشرۍ افغان لوبډله به د بنګلهدېش پر وړاندې خپله درېیمه ټیسټ سیالي ترسره کړي. ټاکل شوې ده چې دا لوبه د اکټوبر په نهمه د ابوظهبي په کرکټ لوبغالي کې پیل شي.
افغانستان او بنګلهدېش تر دې مخکې دوه ټیسټ سیالۍ کړې دي. د دواړو لوبډلو د مخکنیو مخامخ سیالیو پایله برابره ده؛ افغانستان یوه او بنګلهدېش یوه بریا ترلاسه کړې ده.
افغانستان تر اوسه په ټیسټ بڼه کې ۱۱ سیالۍ ترسره کړې دي. افغان لوبډلې درې لوبې ګټلې، اووه یې بایللې او یوه سیالي یې په مساوي پای ته رسولې ده.
د افغان لوبډلې لپاره دا سیالي په داسې حال کې ترسره کېږي چې د ټیسټ لوبو په برخه کې د خپلې تجربې د زیاتولو هڅه کوي. د رحمت شاه په مشرۍ لوبډله غواړي د بنګلهدېش پر وړاندې ښه سیالي وکړي.
افغانستان به له دې ټیسټ سیالۍ وروسته د بنګلهدېش او زمبابوې په ګډون په درې اړخیز یو ورځني ټورنمنټ کې هم برخه واخلي. د یادو شویو سیالیو کوربهتوب د ابوظهبي کرکټ لوبغالی کوي.