فیدان د افغانستان د پوځي حضور په یادولو د مکې دفاعي تړون دفاع وکړه

د ترکیې د بهرنیو چارو وزیر هاکان فیدان د مکې له دفاعي تړون سره د خپل هېواد د یوځای کېدو په اړه د نیوکو په ځواب کې، په افغانستان کې د ترکیې پخوانی پوځي حضور د بېلګې په توګه یاد کړی دی.
فیدان د شنبې په ورځ له «ټيجيآرټي» ټلوېزیون سره په مرکه کې وویل، ترکیې په تېرو کلونو کې افغانستان ته ځواکونه لېږلي وو؛ خو هغه مهال دا اندېښنه نه مطرح کېده چې ښايي د دغه هېواد سرتېري هم د امریکايي ځواکونو په څېر په غرنیو سیمو کې خپل ژوند له لاسه ورکړي.
د نوموړي په وینا، د مکې دفاعي تړون د منتقدانو دریځ دوهګونی دی. هغه استدلال وکړ چې ترکیه د ناټو غړیتوب له امله له نیوکو سره نه مخ کېږي، خو کله چې د یوه مسلمان هېواد د دفاعي تړون خبره راپورته شي، نو پرې اعتراضونه کېږي.
فیدان ټینګار وکړ چې له یاد تړون سره د ترکیې یوځای کېدل په دې معنا نه دي چې انقره به سمدستي جګړې ته داخلېږي. د هغه څرګندونې د تړون پر وړاندې د کورنیو او بهرنیو نیوکو په ترڅ کې شوې دي.
سعودي عربستان، پاکستان او ترکیې د روان میلادي کال په اګست کې ګډ دفاعي تړون لاسلیک کړی و. د تړون له مخې، پر یوه غړي هر ډول وسلهوال برید د ټولو درېیو هېوادونو پر ضد برید ګڼل کېږي.
د ترکیې پارلمان هم د نومبر په میاشت کې دغه تړون تصویب کړی دی. فیدان په خپلو څرګندونو کې د افغانستان موضوع د دې لپاره یاده کړه چې وښيي د ترکیې پوځي همکاري له پخوا هم په نړیوالو او ائتلافي مأموریتونو کې شامله پاتې شوې ده.