بصيرالحق عادل

 

 

د «رنګونه مشالونه» په نوم د ښاغلي سيد اصغر هاشمي نوی کتاب چې د ګډو مقالو ټولګه ده تازه چاپ شوې ده.

ښاغلی هاشمي وايي، په دې کتاب کې يې ادبي، ټولنيزې او د ادب تاريخ اړوند بېلابېلې مقالې ځای پر ځای کړي دي.

رنګونه مشالونه د مهين خپروندويي ټولنې له لوري په ۱۰۰۰ ټوکه کې په ښکلي صحافت تازه چاپ شوی دی.

د ښاغلي پوهنيار سيد اصغر هاشمي تر دې مخکې هم لسګونه کتابونه چې يو شمېر يې څېړنې او ژباړې دي چاپ شوي دي.

هاشمي چې دا مهال کنړ پوهنتون کې د استادۍ دنده مخته وړي وايي، غواړي د ليکوالۍ له لارې ادبي او ټولنيز موضوعات وڅېړي او محصلينو ته يې وړاندې کړي.

غزل

څومره چې ژر نزدې کېدلې ورځې شپې اختر ته
زه هم خپه ومه او ته هم ژړېدې اختر ته
دلته په هر کور کې به مړی و، زخمي به پروت و
له دغه غمه ما ونکړلې جامې اختر ته
ورور يې يتيم، وراره يتيم، خوری يتيم پاتې شول
دغې جينۍ لاسونه پښې نه کړلې سرې اختر ته
پر وچو شونډو د جانان که مسکا وغوړيږي
تکل مې کړی چې نکريزې به ور وړې اختر ته
مونږه د يو بل سره ناست يو خو موږ ژاړو ځکه
عادله راغلې دلته شاوخوا جنازې اختر ته
۱۳۹۵ل / ۴ / ۱۴
د روژې وروستۍ ورځ

 

زما درد درد زندګۍ ته چې سلګۍ ورځارېدله

ستا  حسن  ته  جانانه  ښاپېرۍ  ورځارېدله

 

ټوټه څادر يې پورته کړ روان شو مزدورۍ ته

پاچا و چې په شنه سهار مورکۍ ورځارېدله

 

هغه ؤ په کوڅه کې په زړګي لاسونه ايښي

خو هاغه لېونۍ به په بلۍ ورځارېدله

 

هر څومره چې ور ځير شومه يو زه ومه يوه ته وې

اسمان کې يوه ستوري ته سپوږمۍ ورځارېدله

 

هغه کيسه د چا وه يه ملنګه راته وايه!

چې دغه خړ مزار ته لېونۍ ورځارېدله

 

عادله نوم دې چا ؤ کلک په زړه پورې نيولی

په ډکو ډکو سترګو يوه جينۍ ورځارېدله

۱۳۹۳/۱۱/۶

خپله جونګړه