زلمی زلمی

 

راشـه ای نـاصـحه لــه مـسـتـانو سـره مــل شـه
یا د خدای څراغ شه په دې توره شپه کې بل شه

خـوښ یـم لـه ساقي سـره، سپیڅلې مـیـکـده کې
تـه هـم دلـتـه راشـه، زما د زړه د کعبې پـل شه

نـور د خـدای ځلېږي پـه هـر لوري د دونیا کې
نـور پـه زړه کې سـاتـه، د رڼـو لارو مـزل شه

مــه تـویـوه ویـنـې، تـجـارت د ویـنـو مــه کــړه
لاس لـه ویـنـو ساته، د زخمي زړونو درمل شه

وگــوره نـصـرتـه، قــافــلـه د ژونــد تـېـرېــږي
مـخـکـې لــه خـزانـه د بـهـار د بــڼ غــزل شــه

۱۹ جنوری ۲۰۲۰
وایله
دنمارک

 

یو خوږ یاد مخې ته دنگ شو
د سرو میو جام مې ړنگ شو

زړه مې تنگ شو میکده کې
له پیالوسره مې جنگ شو

د ساقي خوږې خبرې
د بې سوره نغمې ترنگ شو

شوه خوره تیاره پر سترگو
ساقي هم رانه په څنگ شو

ځان مې ولیده گودر کې
گودر جوړ راته اورنگ شو

مازدیگر و زیړی لمر و
بوی د عطرو د لونگ شو

مات خمار مې شو گودر کې
د بنگړو چې سره شرنگ شو

څو ترخې ترخې خبرې
را گذار تیر د خدنگ شو

چې پر شنه لوپټې کیناست
زړه د زړه سره همرنگ شو

د خوږې مینې په شمه
نصرت وسوزید پتنگ شو
۰۶.۰۱.۲۰۲۰
وایله
دنمارک

 

 

یادونه: سوژه مې د منلی شاعر ښاغلی محمد صدیق ننګ له شعره:
یو خیال و رانه بر ته او زه لاندې غورځیدم
د پښو لاندې مې غر ته او زه لاندې غورځیدم
اخستي دی

د کوز کلي ښامار

که تومن دی که دالر دی که کلدار دی
که څوک خنډ دي ترقي مخ ته دیندار دی

 قهرمان مې د وطن غاصب قاتل شو
 هر غلام او گوډاگی د ملک واکدار دی

 چې خدمت کوي وطن ته بې دفاع دی
 وژل کیږي هر قدم کې خدمتگار دی

 غل قاضي دی، غل حاکم دی، غل سالار دی
دا پردي دې دا د کوز کلي ښامار دی

 پاتې نه شوله حیا په کشر او مشر
 حیا خرڅه شوه ارزانه په بازار دی

 نه تمکین شته، نه کاکه اونه عیارنور
 نه ارمان کې هم څوک پاتې ایمانداردی

 بې شرمانو وطن وخوړ،ای نصرته!
 شوکمارې د شرافت نوی معیار دی

۰۷.۱۲.۲۰۱۹
وایله
دنمارک

 

 

څه چې څښلې ما د سترگو په پیالو کې
هغه څښلی دې تا کله په جامو کې

هسې تش ځانته میخور وایې چې زه یم
په یو جام باندې بې هوش شي میکدو کې

محبت، محبت وایې، مجنون نه یې
هسې ځان شمیري قطار د لیونو کې

نه یاغې یې نه باغې یې په خپل عشق کې
هسې بند یې په ناکارو سنتو کې

ای نصرته ځم په عشق کې مې تر داره
نور بند نه یم په رکوع اوپه سجدو کې

۰۳.۰۱.۲۰۲۰
وایله
دنمارک

 
ای آرامه ناقراره!
ای افغان کاکا مراده!

ته مړ نه یې ته ژوندی یې
ته یو غږ یې یو صدا یې

ته پژواک یې ته یو ژواک یې
ځلاند ستوری د ایشیا یې

ستا صدا زموږ سبا ده

ای آرامه ناقراره
ای افغان کاکا مراده

وچو دښتو او رغو کې
یو نفس یې یو هوایې

په درو او جگو غرو کې
د نادارو یو ندایې

ای افغان ناکاموراده

ای آرامه ناقراره
ای افغان کاکا مراده

د تور سرو او سپین سرو
 یو امسا د افتاده وې

 د یتیم او د بې کسو
د دردونو مدا وا وې

د تیارو ورځو رڼا وې
تورو شپو ته یو ځلا وې

لاره ستا به وی تل ښاده

ای آرامه ناقراره
ای افغان کاکا مراده

تا به څنگه هیروو مونږ
چې غمو سره ژړا وې

د خوښیو یو خندا وې
افغان درد سره اشنا وې

شاړو ځمکوته کیمیا وې
بې تعصب او بې ریا وې

د نصرت د لار ارشاده

ای آرامه ناقراره
ای افغان کاکا مراده

۱۵.۱۲.۲۰۱۹
وایله
دنمارک