عزت الله ذکي

ژونده مرګي ته نور په غاړه ورځم
عهد پوره کومه تر دلداره ورځم
په فاني ژوند هیڅکله نه مړېږم
مرګيه ستا تر تود بازاره ورځم
»»»»»
سپوږمۍ رڼا کړه ماته لار وښيه
د سپینو ستورو تر قطاره ورځم
شفقه تا ماتي کړې توري تیاري
د سباوون تر سپین سهاره ورځم
»»»»»
آفتاب مهتاب ورته له عشقه ژاړي
تر لوی خالق او ستر باداره ورځم
که مي په برخه ربه ستا رضا سوه
ستا وه جنت ته به سینګاره ورځم
»»»»»
ایمانه ټینګ مي محاصره کړه نفس
چي خپل خالق ته توبه ګاره ورځم
یوازي زما نه د هرڅه څښتن دی
زه د زړګي تر ستر واکداره ورځم
»»»»»
زما بغاوت نه الله ښه خبر دی
زه يې دربار ته شرمساره ورځم
که مي په رحم کرم ونه بخښي
هلته به ټیټ سر ګنهګاره ورځم
»»»»»
د زړګي څړېکي به وروړم هلته
ذکي د یار تر شنه مزاره ورځم
نسیمه وایه زما سلام پر حبیب
د مدینې تر پاک دیاره ورځم
»»»»»
جانان که ومنی وړاندیز د دیدار
زه يې دیدن ته په تلواره ورځم
نفرته نور مي درنه کډه وکړه
د محبت تر ښکلي ښاره ورځم
»»»»»
خزانه دا ځل مي ونه رژوې
یمه مېلمه زه تر بهاره ورځم
ژوندونه تا چي کله تېر ایستمه
د مرګ په غېږ به پُرخماره ورځم
»»»»»
د زړه پر سر مي د یار نوم لیکلی
درخواستي تل به زه ناچاره ورځم
فراقه مه سوځه نور ما په لمبو
ذکي وصال ته په دا لاره ورځم
١٣٩٨/عقرب/٣مه
شفق

***
خدای به ژر وطن ته سوله راولي
مل د جنګ ځپلو افغانانو رب
نور افغانستان به هدیره نه سي
مل د غم ځپلو افغانانو رب
***
رب به ورورژنه نوره ختمه کړي
مل د سوزمنانو خوږمنانو رب
وصل ته د یار په لنډ مزل ورځي
مل د ستړو ستړو لارویانو رب
***
ټولو نه بېوسه ښه نږدې ورته
مل د بېوسانو بندګانو رب
پام آزار ورنه کړې نازولو ته
مل د بېګناوو مظلومانو رب
***
مینه يې سپېڅلې او تلپاته ده
مل د پاک زړګیو انسانانو رب
مه ګوره حقیر وه بېوزلانو ته
مل د غریبانو فقیرانو رب
***
ولړزوي عرش په ساندو د آرمان
مل د یتیمانو معصومانو رب
ښه ایسي غرور د هغه ذات سره
مل د عاجزانو خاورینانو رب
***
ټوله د رب شکر او ثناء وايي
مل د بلبلانو ذاکرانو رب
ورسه نور له نفسه آزادي واخله
مل د بېراهانو آسیرانو رب
***
څوک که د لیلا دیدن ته تږی وي
مل د کړېدلو مجنونانو رب
عاجزه ولاړ يې پر دربار شاهان
مل د ناچارانو عاشقانو رب
***
د هرڅه خالق دی د هرڅه مالک
مل د رښتینانو مومنانو رب
ټوله مجرمان ځني سرکښه دي
مل د متقیانو صالحانو رب
***
نه آوري آواز د دوزخیانو نور
مل د جنتیانو مهمانانو رب
د ذکي د زړه خوناب غزل لیکي
مل د دردمنانو شاعرانو رب
***
١٣٩٨/حمل/٩مه
شفق

يو ښايسته غوندي نړۍ ده
پکښي لمر دی هم سپوږمۍ ده
****
مخلوقات ټول پکښي اوسيږي
خو په خپل شکل کښي ګيردۍ ده
****
د بشريت د زېږون ځای دئ
مالومه له تاريخه پخوانۍ ده
****
محل د ازل او مزل دواړو
که څه هم نورو ته کوچنۍ ده
****
بشر پکي پيدا پکي ښخيږي
پلمه د ژوند ده آزادۍ ده
****
د عزت او ذلت ځای دئ
خبره د اسلام، مسلمانۍ ده
****
څوک خوشحال پکي اوسيږي
چاته پېلامه د بدبختۍ ده
****
چا پکي عجيبه مزې وکړې
د چا کفن پکار دی، ليونۍ ده
****
بس په هر چا باندي تيريږي
ذکي وايمه ناڅي ښاپېرۍ ده
۱۳۹۸/قوس/۱۲مه
غرمه

زما دي عشق ته تلوسه وه په تلواره نه وه د یو دیدن مي اندېښنه وه په یکباره نه وه

دنیوي مینه یو لحظه وه دوامداره نه وه زما د روح ستړې دوره وه برقراره نه وه

»»»»»

څه په غمونو او دردونو باندي تېره شوله د ژوندون لنډه سلسله وه وفاداره نه وه

»»»»»

آبد منزل ته په ورو ورو مزل ژر ورسېدم دا د تېز باد يوه څپه وه په بارباره نه وه

»»»»»

قراره تاته په ګونډو او په څکېدو راغلمه آغزن مسیر و نه ډېوه وه سمه لاره نه وه

»»»»»

ما ورته اوښکو نه یو ډکه پیمانه ډالۍ کړه یار ویل زهرو نه ترخه وه مزه داره نه وه

»»»»»

باران د کاڼو تل اورېږي پر بارداره درخته مالیار رېبلې يې ریښه وه ثمرداره نه وه

»»»»»

کبابوی هغوی د بل په درد چي خپله زړګی په دردو ډکه يې سینه وه بې پرهاره نه وه

»»»»»

له انعاماتو يې محروم هغوی ته نه رسېږي د چا چي ژبه په خوله وه شکرګذاره نه وه

»»»»»

تاته سپوږمۍ عاجزه وه دلبره مه شې نظر د وصل شپه بله ډېوه وه خو هینداره نه وه

»»»»»

زه ګنهګار سرکښه یمه ستا د عفوي طامع اﺉ ستر خالقه بېله تا مي بله چاره نه وه

»»»»»

ذکي آجل درپسي نن ډېر زیات لټون کولو د روح قابضه مېلمنه وه دستورداره نه وه

١٣٩٨/عقرب/١٥مه ماښام

تل توکل په رب کوه چي مايوس نه شې
په هر دم رب يادوه چي بې وس نه شې
<<<<>>>>
مصيبت کي که ايسار شوې خير يې غواړه
په آُميد رطب شکوه چي هيڅ بس نه شې
<<<<>>>>
د پاک ذات د نعمتو ناشکري مه کړه
دا غضب ځان پوه کوه په هوس نه شې
<<<<>>>>
په باطلو وسوسو که زړه سلطه شو
حق مطلب تعقيبوه چي قفس نه شې
<<<<>>>>
په تدبير به خپل تقدير هيڅ تغير نه کړې
لوړ منصب مه خوښوه چي ته پس نه شې
<<<<>>>>
د ظاهر پرځای باطن له باطل پاک کړه
د طيب لار خپلوه چي په ترس نه شې
<<<<>>>>
ټول مخلوق ځمکه اسمان يې ثناخوان دي
ستر صاحب مه هېروه چي بې کس نه شې
۲۰۱۸/مارچ/۵مه
کندهار