شیرین اغا جهانګیر

پسرلی

پسرلي خو ما لیدلي

پسرلی خو داسې نه وي

دا نو څنګه پسرلی دی

چې لمبې لري په غيږ کې

پسرلی چې کله راشي

بلبلان په نغمو سر شي

خو دا چم څه عجیبه دی

دلته ډار زړونو کې خپور شي

ګونګوسي د جنګ شروع شي

هوا ورځ تر بلې تود شي

د مارانو سره یو ځای

انسانان له سوړو وځي

خپل بدرنګ ټوپک ترشاه کړي

جنتي کلي ته راشي

دوزخي کارونه پیل کړي

د هر ګل په پاڼه پاڼه

د بلبلو پر وزرو

لپې لپې لمبې توۍ کړي

فضا ټوله دوزخي شي

د شنه فصل په شنې پولې

یو غلمان ماشوم راګیر کړي

د قلم څوکه يې مات کړي

کتابچه کړي ورته څیري

غلمان سپینې اوښکې توي کړي

په سلګو شي په ژړا شي

ځان پر ځمکه ځمکه ولي

په ماشومه ژبه وايي

مورې! مورې! کتابچه مې!

 

شیرین اغا جهانګیر

رباط سنګي هرات

۲۷-۰۳-۲۰۱۰

 

 څلوریځه

وعده وکړه چې ته به مې هم ساتې په زړګي کې

لــــــــرمــــه درته ډېـــرې نـنـواتې په زړګي کې

 

لمبه مې کړه ایرې مې کړه قســمته خو لږ تم شه

د چــا د دیــدن هـیــلې دي راپــاتې په زړګي کې

 

شیرین اغا جهانګیر

رباط سنګي هرات

۱۵-۰۳-۲۰۱۰

 څلوریځه 

لاړې د وختونو قافلې زه ترېنه پاتې شوم

جوړې شولې ډېرې سلسلې زه ترېنه پاتې شوم

 

ما د ژوند پر لاره د خپل سیوري پل نیولی وو

وکړې دنیاوالو فیصلې زه ترېنه پاتې شوم

 

۰۶-۰۳-۲۰۱۰

شیرین اغا جهانګیر

رباط سنګي هرات

یاره که د خپل نظر ښاغلی دې کړم در به شم

سوځم لمبه کېږمه که غلی دې کړم در به شم

 

سوچ کې مې هم نه راته چې دومره به بدنامه وې

مینې که د ځان غوندې سپېڅلی دې کړم در به شم

 

زه مې لکه خپل د قسمت ستوری راپرېوتی یم

خیاله که د لمر په شان ختلی دې کړم در به شم

 

لار مې د منصور لاره منزل مې د منصور منزل

ګورو به زندانه که تړلی دې کړم در به شم

 

دا تندی د غره تندی د وخت سجدې ته جوړ ندی

پوه یمه ضميره که وژلی دې کړم در به شم

 

شیرین اغا جهانګیر

۲۶-۰۱-۲۰۱۰

رباط سنګي هرات

 

 

زما که د لمبه لمبه وجود بڅرې مړې شي

ایله به ددې ښار دلیونو سندرې مړې شي

 

ما لوستي د منصور دافسانې د کتاب پاڼې

والله که مې په دار هم ارادې د یرې مړې شي

 

چې اوړي له شمشاده تور کارغان پر دغه ځمکه

نو خود به د سپین غره د سردرو کونترې مړې شي

شیرین اغا جهانګیر

۲۹-۰۹-۲۰۰۹

هرات

 

 جذبات

د نیمګړي خوب تعبیر دی حادثاتو ته مې سپاري

که انجام د محبت دی وړي حالاتو ته مې سپاري

 

د تدبیر په زنځیرونو د تقدیر دروازې بند کړي

بغاوت به رانه وشي جذباتو ته مې سپاري

 

مینه هسې هم ده کفر دیدن هسې هم حرام دی

امیدونه رانه اخلي مشکلاتو ته مې سپاري

 

اراد ې مې د عشق جنګ کې رواجونو ته تسلیم شول

وخت تړي راته لاسونه روایاتو ته مې سپاري

 

په سفر د انتظار مې ډېر کلونه تېر شول بیا هم

د یقین کورته مې نه وړي امکاناتو ته مې سپاري

 

شیرین اغا جهانګیر

نوی ډیلی

۲۸-۴-۲۰۰۷

 

ویـــر زما ټــپه شــوله ســندره شوه

میـــنه می کیــسه شـــوله خبره شوه

 

اوښکه تړمې تړمې د ګریوان په چم

پرېــوته له ستـــرګو مسافــره شوه

شیرین اغا جهانګیر

۰۶-۰۸-۲۰۰۹

هرات

نـــظر دې د ګلـــــونو د ګلــزاره دی راغلی

زما د ســـوي زړه تر یــکـه زاره دی راغلی

 

تعبـیر مې د خوبونو یو د بل پســې راوځې

د میــنــې د انکـار خــبــر د یاره دی راغلی

 

شیرین اغا جهانګیر

هرات

۳-۱۲-۲۰۰۹

سپرلیه چې د اور جامې په تن راله رانشئ

کنډر پروت دی لمبه لمبه وطن راله رانشئ

 

باروتو د ګلبڼ د ګلو څانګې دي سیزلي

پرې شوي چنارونه دي کونترې چاوژلي

 

د کلي د خاورین جومات منار دی نړېدلی

زمونږ د هیلو ناوې زمونږ ښار دی نړېدلی

 

کلونه کیږي دلته د بلبلو نغمې نشته

ډیوې د تورو شپو د سهرونو وږمې نشته

 

خاموشه تورې شپې دي سهرونه غم لړلي

ازغنی ټولی لارې منزلونه غم لړلي

 

ښایست مو د ګلونوم  ماشومانو لولپه دی

د خدای واړه مخلوق زمونږ د ویر په تماشه دی

 

شیرین اغا جهانګیر

رباط سنګی هرات

۰۷-۰۱-۲۰۱۰

 

مو ماڼې لولپه شوې په ګورګورو تالان ګډ دی

سپین غر لمبه لمبه شو په کونترو تالان ګډ دی

 

ګرم ندی کنړ سیند که کروندې راځني یوسي

نن هلته سردرو کې په نښترو تالان ګډ دی

 

پامیر له ډیره شرمه سر ګریوان ته دی ور وړی

د لويې پکتیا په شمله ورو تالان ګډ دی

 

له شرمه د خپل قبر شناختې پټې ناهیدې کړې

کندهار کې د ملالې په سندرو تالان ګډ دی

 

قربان دې له ایمانه شمه څه شوې بت شکنه

د مات بودا په خاورو او ډبرو تالان ګډ دی

 شیرین اغا جهانګیر

۲۹-۰۹-۲۰۰۹

هرات