زیب منتظر مسید

لږمې پريږدی
چې په چوپه اوخاموشه
غلې دپه يوه ګوښه کې
تک تنهايوازې ځانته
لږساعت يوه ګړۍ کينم
خپل خوره وره، ورک شوي
تراهيدلي ،ويريدلي
بوږنيدلي ريږديدلي
عقل،پکراوشعورمې
سوچ اوخيال سره راټول کړم
ځان،جهان ،حالت راغلی
دښه، بدپه تله تول کړم
لږمې پردﺉ! چې سوچ وکړم
دتورمخې بدمرغۍنه
تکې تورې تاريکۍ نه
دغمونودکوهي نه
ددښمنې ناپوهۍ نه
دوتولار که پيداکړم
داتیاره توره رڼاکړم
لږمې پريږدﺉ!
پدې ورانوکنډولوکې
دمرګي غوبل وهلو
ړنګوکليواوبانډوکې
غروراغو،دښته ،دروکې
بې کفن لت پت پروتوته
سروشيندلوجسدوته
بندوبست دلحدوکړم
نیمه خواله دنیاتللیو
ته دعادابدوکړم
لږمې پريږدی !
هغې خوارې دړديدلې
ځوريدلې ،کړيدلې
غمړلې بورې مورته
خړسپيره ،یتيم ماشوم ته
ژړاغوني اومعصوم ته
ورنژدې شم حال یې زده کړم
انساني پوریې اداکړم
لږمې پريږدی !
خوار،غريب ،خيرن بوډانه
خپل بې وسه تره، دادانه
يوې ټوټې مړۍ په تمه
لاس یې اوږدلکه ګدانه
داحوال پوښتنه وکړم
په سره اورکې یې تيرکړي
دمهال پوښتنه وکړم
ویریې واورم فریادواورم
څه یې هيرڅه یې یادواورم
لږمې پريږدی
دابليث په تورناولي
کرغيړن مخ توکړم لاړې
په لغتوپرسکویې
ورله مات کړم زنې ،داړې
په لوړغږیې مردارغوږکې
داناره چيغه کړم پورته
ته سپيره یې ،ته ناولی
دالله رسول رټلی
ته تورتم توره تياره یې
لوی فساد،لويه فتنه یې
ته غلط یې ،ته غلط یې
ناروا،ګرم ،ملامت یې
لږمې پريږدی !
لږمې پريږدی !!

پدی وطن کی چی توییږی دادچاوینه ده
نه داغیار،نه ددښمن ده ،زمااوستاوینه ده
داچی لاسونه دې پرې سره دی ترتخرګونوپورې
یادې دورور،یاهم دپلار،یاخوباباوينه ده
رنګ خویی سوردی خوقیمت يی چی دوینی ندی
دادپښتون وینه ارزانه ده ،وړیاوینه ده
تاهم کړه تويه،ماهم تويه،هم هغه تویه کړه
پرون هم وینه وه، نن وینه،هم سباوینه ده
تندرکه ټکه رالویدلی ده زموږپه غولي
ځمکه په وینو،اوبه ویني،هم فضاوینه ده
راشی دخپلې وینې قدرلږپه خپله وکړو
بیابه یې بل په قیمت پوه شي ،خامخاوینه ده
خپلومجبورکړ(منتظر) چی غلی ناست دی ګوري
ګني سوراوریی بل ټټرکی ،هم توده وینه ده

توره تياره کې ميشت یم
دپه، تربته تياره
هرخواخورې دي دتورتم لښکرې
هررنګ یې وخوړبس يوتورپاتې دی
لکه تورديوډيوې ،څراغونه وژني
نه ترې رڼانه ترينه نورپاتې د ی
هم موټول غولی هم کوڅه تياره ده
څه عجيبه غوندې سپيره تياره ده
زموږپرکلي یې ولکه کړيده
زموږدښکيلاک يې اراده کړيده
زه مې خپل زړه ورښیيم
چې پرهارژلی دی ټول
دوينودارې ترې ځي
ټپي ويشتلی دی ټول
دريغه څوک نه یې ويني
سترګې ړندې دټولو
تورې تيارې پرې غلبه کړيده
غږمې هم نه اوري څوک
نه مې نارې نه سورې
نه مې فرياد،نه سلګۍ
څه عجيبه تیاره
غوږونه هم کڼوي
هرڅوک کاڼه ،ړانده دي
هرڅه تیاره تياره دي
څیرمه مې خواته څراغونه وینم
بلې ډيوې وينمه
خونه پوهيږم ولې
ددوی رڼاروښانه سپينه نده
دغه تياره رڼاکولې نشي
تورې تيارې کې لالهاندولره
لاردمنزل روښانولی نشي
څه عجيبه ډيوې دي !؟
هغلته ليرې څه ځلاوینمه
په پورې کلي کې ډيوې بلیږي
لارې کوڅې روښانه کړې يې دي
هم پکې تورهم پکې سپين ښکاريږي
خويې ترموږپورې رڼانه رسي
څه عجيبه ځلاده !
زموږډيوې هغوی ته ورته ندي
رڼاپه نوم باندې تورتم خوروي
لکه ښاماردي خوري دنوربڅري
خپل توروزرپه کلي چم خوروي
په هره لارلکه ديوال ولاړې
موږته رڼا،روښنايي نه راپريږدي
څه عجيبه ډيوې دي !؟
زماهم ډيوا په لاس کې
غواړم تورتم کې يرغملولره
تورې تيارې له غيږې
دوتولاررڼاکړم
ورسره مرسته وکړم
ورته منزل پيداکړم
خو!
افسوس ددوی تيارې نيولې سترګې
زمادلاس دڅراغ رڼانه ويني
ذهن،شعور،سوچ تياره کړي یې دي
هم خوخپل ځان اوهم دنيانه ويني
زه يم روان دوتوهڅه کوم
لاره خووينم خومنزل مې ورک دی
ګامونه اخلم ګړندي اومظبوط
لاکن دلارې رانه مل مې ورک دی
چې یې منزل په لوري لارراښوده
دپلارنيکه دپښو،غه پل مې ورک دی
ترګړنګوپورې ایستلم به یې
هغه غښتلی هوډ،تکل مې ورک دی
هرخواتيارې نيولې
کورهم کوڅې نيولې
څه عجيبه تياره ده
خداېږوملګروڅه کول پکاردي
ځان ومنزل ته رسول پکاردي
دغه ناولې اوخيرنه تیاره
له کوراوکلي نه شړل پکاردي
داکرغيړنې داسپيرې کټوې
چې یې مقام دی دډيوو نيولی
ليرې ګوښه کې غورځول پکاردي
منزل دې لیرې موږډیرشاته پاتې
غښتلی ګام،کلک هوډ،تکل پکاردي
سرپه ورغوي کې ورځوبه وړاندې
دتورښارسر،پښې تړل په کاردي
راځی ملګروچې چاره يې وکړو
لاس دتدبیرپورته اوچت وراوږدکړو
سپین ،رڼه ستوري له اسمانه راوړو
ترې څراغونه اوډيوې جوړې کړو
ښايست،ښکلابه دجانانه راوړو
هم به پرې کوراوهم کوڅه رڼاکړو
توربه هم وينو،هم به سپين پيداکړو
لکه دپورې کلي
هسې ډيوې بلې کړو
نوردپردوډيووعسرې به نکړو
توروتيارو کې ورځې ،شپې به نکړو
هم به مولاره هم منزل پیداشي
که موپه زړونوکې تکل پيداشي
(منتظر)ګام پورته په دغه هوډدی
خوکاش دلارې یې څوک مل پيداشي

۱۹ /۳/ ۲۰۱۰
پېښور

څه سپيره فضاده دا،څه سپيره وختونه دي
ژوندخدايږوبې مالګې شو، تللي يې خوندونه دي

تورې شيطاني تيارې ،لمر په بډوهلی دی
هرخواته تورتم خوردی ، مړه ډيوې ،څراغونه دي

وخت هغه موسم هغه ، سورګل ،هم چمن هغه
مات دبلبل ستونی دی ، ورک يې اوازونه دي

لت پت په سروينوکې ،بسمل په شان شرين رغړي
نه دفرهادوروڼه نشته ، نه يې مات سرونه دي

خورچې يې په لراوبرنوم ستردميړانې وو
هسکې غاړې وړای نشي، ټيټ يې نن سرونه دي

پوه اوهم ناپوه حيران ،دواړونه لارورکه ده
جبردی عجب واکمن ،بندعقل،پکرونه دي

څه دناپوهۍ ښامارڅه دځان ځانۍ بلا
مينه ،محبت وخوړ،وران خراپ نيتونه دي

هرسړی سیم زرغواړي ، بیه ،قیمت نه ګوري
وتی یې له ياده دقارون ډیردولتونه دي

تورابليث لګيادی دانسان دسرسوداکوي
مېنه دپښتون کې یې جوړکړي بازارونه دي

لرګوره هم برچې يزيدانوکربلاجوړه
ګوټ پسې بل ګوټ کړي ډک دوينویې جامونه دي

سوال درته منت کوم پښتونه ځان لږويښ دې کړه
کړي دې دښمن دورکيدلوسوګندونه د ي

ښکاري (منتظره ) ته دې هسې دزړه وينې خورې
ډيروتاپه شان ويلي کڼوته داشعرونه دي

دا حالات راته بې خوند ه غوندې ښکاري

کلی، چم راته بې ژونده غوندې ښکاري
دښمن مات به دې پښتونه وي، خو ستا هم

ژوند ویجاړ راته څوچنده غوندې ښکاري
هیر کړه خوب د پرون، غم د نن، سبا خوره

دا اوبه تیرې له ونده غوندې ښکاري
ډیوه نلرو په لاس، پرې ور روان یو

مخکې لار راته یوه کنده غوندې ښکاري
تل د بل په ژوند کې لاس وهو، شوو روږدي

اوس دا خپله راته دنده غوندې ښکاري
لټوه خپله خوښي دبل خوښي کې

دا کیسه ډکه له پنده غوندې ښکاري
چې یې پرخه د خولو پر سپین مخ رغړي

هره ساه مې راته تنده غوندې ښکاري
ته ترخه، خو دا خولګۍ دې خوږه لګي

خوند اخیستی یې له قنده غوندې ښکاري
د ټکري پیڅکه نیولې یې وه خوله کې

دا ادا یې هنرمنده غوندې ښکاري
17/3/2017

جلال اباد