سمیره کوچۍ

زړونه يې نشته کوګلونه يې خالي پاتې دي

خدايه دا خلګ لا په کوم الفت ژوندي پاتې دي

دا ستا راتګ او تګ جانانه د ګلاب په شان دى

چې چيرته تلى کېنستلى يې ازغي پاتې دي

اوس يې تصوير په سترګو نه ږدم اوس يې نه ښکلوم

اوس يې نه ياد نه يې خيالونه ليوني پاتې دي

د دې خورو چيغو او هم د بهېدلو اوښکو

ټول حسابونه بس په سر د يو سړي پاتې دي

دغه رواج د دغه قوم سره تر اوسه مل دى

چې په کې ډېر پردي دوستان، دوستان پردي پاتې دي