عبدالهادی عثمانی

 

 اختر مو مرور دی خوشحالۍ هم کډه کړی
 ددی ولس له کوره نیکمرغۍ هم کډه کړی

 ګودر مو په ژړا دی او چنار مو ساندی وایی
 ګلونه هم خفه دی او ګیډۍ هم کډه کړی

 غمونه مو میراث دی او دردونه مو نصیب دی
 دا څو لسیزی کیږی ملالۍ هم کډه کړی

 زموږ اوښکی وچی سوی زموږ زړونه اوس ژړیږی
 زموږ آه هم سوځیدلی او سلګۍ هم کډه کړی

 مجنونه نور به ژاړی ارمانونه دی میرات سوه
 ها ستا چی خوښیدل هغی نجلۍ هم کډه کړی

 یو دوه ماشومان راغله عثمانی ته په ژړا سوه
 زموږ بابا شهید سو او مورکۍ هم کډه کړی
 

 

 ددی دردمند سړی د درد دختمیدو لپاره
 باداره راکړی یو ملهم د جوړیدو لپاره

 د مین زړه لکه غنم پر دغه منځ چاودلی
 ټول به دعا کړو ددی زړه د رغیدو لپاره

 ستا دنازکو او پستو شونډو د رنګ په خاطر
 لب سیرین دی راسره د سره کیدو لپاره

 د مینانو د وصال او د دیدن په تمه
 له ډیره وخته انتظار ددی شیبو لپاره

 یو ځل می ولید عثمانی اوس می له خیاله نه ځی
 د انتظار لحظی شمیرم د بیا لیدو لپاره