جاوید یارزی

خدایه قبول مې کړه سوالونه، درته سوال کومـــــــــــه
نور له موږ لرې کړه جنګونه ، درته سوال کومـــــــــــــــــه

سر مې قبول کړه چې ترې ځار یې کړم وطنه ځنې
خو نه د کونډې مور ویرونه، درته سوال کومـــــــــــــــــــه

ما لیونۍ د یو زمان په انتهاء کې ویښ کــــــــــــــــــــــــــړه
چې خوشحالي وي هم جشنونه، درته ســـوال کومه

د غیرتي ولس پکړۍ نه ، نن بهیږي وینــــــــــــــــــــــــــــــــــې
ټپونه ټول کړې ته ګلونه، درته ســــــــــــــــــــــــــــوال کومه

ځان مو ونه پیژند یارزیه! خدای به څه پیژنــــــــــــــــــــو
ربه! راوښیې ځانونه، درته ســـــــــــــــــــــــــــــــــــــــــوال کومه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
جاوید یارزی
۱۳۹۶/۱۲/۷

اوس لر را څخه ورک دی، او هم بر را څخه ورک دی
خبرې شوې کې ډیرې، سم نظر را څخه ورک دی

دیدن به د منګي سره، ارزانه ؤ په لار کې
بدل شوله حالات، او که ګودر را څخه ورک دی

ډیوه ګرځوم ورځ کې، عجیبه ده راته خاندي
د سترګو ځیر مې کم دی، او که لمر را څخه ورک دی

په څنګ کې مې د یار، خماري شوی یم بې بنګو
عجیبه نیشه یي شوم ، خپل څادر را څخه ورک دی

یارزیه لیونیه! اوس رمې پیایه په غرو کې
چې چغې وهې لار کې ټیک د سر را څخه ورک دی
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
جاوید یارزی
۱۳۹۵/۵/۲۱