بنګلهدېش د افغانستان پر وړاندې د ټیسټ لومړۍ ورځ په ۳۱۷ منډو پای ته ورسوله

بنګلهدېش د افغانستان پر وړاندې د ټیسټ لوبې په لومړۍ ورځ، چې د متحده عربي اماراتو په ابوظبۍ کې روانه ده، د اتو لوبغاړو په سوځېدو ۳۱۷ منډې جوړې کړې.
د افغانستان لوبډلمشر رحمت شاه پچه وبایلله او بنګلهدېش پرېکړه وکړه چې لومړی توپ وهنه وکړي. د بنګلهدېش د پیل لوبغاړو ښه ملګرتیا وکړه او د دواړو ترمنځ د ۱۲۴ منډو شراکت وروسته د افغانستان توپ اچوونکي وتوانېدل چې د سیالې لوبډلې د منډو بهیر ورو کړي.
عصمت عالم د بنګلهدېش لومړۍ ویکټه واخیسته او د پیل لوبغاړو ملګرتیا یې پای ته ورسوله. په دې ورځ سلیم ساپی د افغانستان په توپ اچوونکو کې تر ټولو اغېزناک و، چې د بنګلهدېش درې لوبغاړي یې وسوځول.
یمین احمدزي او عصمت عالم دوه ـ دوه ویکټې واخیستې، په داسې حال کې چې قیس احمد د بنګلهدېش یو لوبغاړی له میدان څخه بهر کړ. بنګلهدېش د ورځې تر پایه اته لوبغاړي له لاسه ورکړي، خو د خپلې لومړۍ پاڼۍ لپاره یې د پام وړ مجموعي منډې ثبت کړې دي.
د لوبې دویمه ورځ به سبا پیل شي او افغان لوبډله به په هغې کې د خپلې لومړۍ پاڼۍ توپ وهنه کوي. د افغانستان لپاره به مهمه وي چې د بنګلهدېش پاتې دوه لوبغاړي ژر وسوځوي او بیا د خپلې توپ وهنې پر مهال د سیالې لوبډلې لومړۍ پاڼۍ ته مناسب ځواب ورکړي.
له دې ټیسټ لوبې وروسته ټاکل شوې چې افغانستان، بنګلهدېش او زیمبابوې په متحده عربي اماراتو کې د ۵۰ اوریزو لوبو په درې اړخیز ټورنمنټ کې ګډون وکړي. دغه سیالۍ د اکتوبر له ۱۷مې تر ۲۳مې پورې ترسره کېږي، درې واړه ټیمونه به له یو بل سره لوبې کوي او دوه غوره لوبډلې به د اکتوبر په ۲۳مه د پایلوبې لپاره مخامخ شي.
افغانستان له دې ټورنمنټ وروسته له زیمبابوې سره د درې شل اوریزو لوبو لړۍ هم لري چې د اکتوبر له ۲۷مې څخه د نومبر تر لومړۍ نېټې پورې دوام کوي. دواړه لوبډلې وروسته دوه ټیسټ لوبې هم کوي؛ لومړۍ یې د نومبر له ۵مې تر ۹مې او دویمه یې د نومبر له ۱۳مې تر ۱۷مې پورې ټاکل شوې ده. د افغانستان کرکټ بورډ ویلي، د دغو لوبو د ترسره کېدو لوبغالي به وروسته اعلان شي.
د کرکټ بورډ اجرائیوي مشر نصیب خان مخکې ویلي وو چې له بنګلهدېش او زیمبابوې سره په بېلابېلو فارمټونو کې لوبې به افغان لوبغاړو ته د تمرین او چمتووالي مهم فرصتونه برابر کړي.