مسکو فارمټ غونډه؛ د طالبانو او پاکستان ترمنځ د امنیتي تورونو تکرار
د افغانستان په اړه د مسکو فارمټ اتمه مشورتي غونډه د روسیې په پلازمېنه مسکو کې ترسره شوه. په دې ناسته کې د طالبانو د حکومت د بهرنیو چارو وزیر امیرخان متقي، د روسیې د بهرنیو چارو وزیر سرګي لاوروف او د سیمې د څو هېوادونو استازو ګډون کړی و.
د امریکا د بهرنیو چارو وزارت د غونډې په تړاو ویلي، هېوادونه باید له هغو اقداماتو څخه ډډه وکړي چې د طالبانو په ګډون د ترهګرو ډلو د ملاتړ په معنا تمامېدای شي. د دغه وزارت یوه ویاند ویلي چې طالبان په واشنګټن کې د «ځانګړې شوې نړیوالې ترهګرې ډلې» په توګه پېژندل کېږي او هېوادونه باید له ورته ډلو سره په چلند کې احتیاط وکړي.
روسیه تر اوسه یوازینی هېواد بلل کېږي چې د طالبانو حکومت یې په رسمیت پېژندلی دی. د غونډې پر مهال سرګي لاوروف د طالبانو د حکومت ځینې اقدامات وستایل، خو د بشري حقونو وضعیت او پر ښځو او نجونو د لګېدلو محدودیتونو په اړه یې یادونه ونه کړه.
لاوروف وویل، د ګډو ګټو له مخې باید د کابل د ترهګرۍ ضد مبارزې وړتیا د لوژستیکي او تخصصي مرستو، او همداراز د استخباراتي او قانون پلي کوونکو ادارو ترمنځ د اړیکو له لارې پیاوړې شي. د هغه دا څرګندونې په داسې وخت کې مطرح شوې چې په ملګرو ملتونو کې د روسیې استازي تېره میاشت ویلي وو، داعش خراسان او د ختیځ ترکستان اسلامي غورځنګ لا هم په افغانستان کې فعالیت لري.
په غونډه کې د طالبانو د بهرنیو چارو وزیر امیرخان متقي پر پاکستان تور ولګاوه چې د افغانستان او سیمې د امنیت د زیانمنولو لپاره پر نوې طرحه کار کوي. هغه ادعا وکړه چې اسلاماباد د پخواني حکومت د پرسونل ترڅنګ د داعش د غړو په وسیله په افغانستان کې د ناامنۍ خپرولو عملي هڅې پیل کړې دي.
د افغانستان لپاره د پاکستان ځانګړي استازي محمد صادق بیا طالبان تورن کړل چې د پاکستان پر ضد د ترهګریزو فعالیتونو «فعال ملاتړ» کوي. نوموړي وویل، تحریک طالبان پاکستان، داعش او القاعده په افغانستان کې فعالیت لري؛ خو دا څرګندونې د طالبانو د استازي له ادعاوو سره په څرګند ډول په ټکر کې وې.
د مسکو فارمټ په دې غونډه کې د چین، هند، ایران، قزاقستان، قرغزستان، تاجکستان او ازبکستان استازو هم ګډون کړی و. د ناستې بحثونه تر ډېره د افغانستان امنیت، له ترهګرۍ سره مبارزه او د سیمهییزو هېوادونو ترمنځ د اړیکو پر څرنګوالي راټول وو.