پښتو لنډۍ

څانګه به نن سبا کې ګل شي
ما يې په سر کې سرې غوټۍ ليدلي دينه

څراغ چې بل شي آخر مړ شي
زړه چې مين شي هميشه لمبې کوينه

څنګه د ورايه په خندا شوې
لکه چې غم دې د زړه ټول هېر کړی وينه

څنګه دروالوزم جانانه
زما وزرې بېلتانه سېزلي دينه

څنګه نرۍ يې لکه لښته
مور دې ړنده شه چې په تا اوبه راوړينه

څنګه په سپينه جامه ګرځې
رب دې مئين کړه چې خيرن دې ووينمه

څنگ ته مې مه راځه جانانه
سبا به بوی د لونگين درڅخه ځينه

څوک د واده په ارمان دینه
چاته په کور کې شاه بلبلې ناستې دینه

څوک محلونو کې اوسیږي
څوک د ناکامه په کیږدۍ کې ژوند کوینه

څوک مې د حاله خبر نه دی
لکه چنار مې په ډډ اور ولګېدنه

څوک په رضا له ملکه نه ځي
يا ډېر غريب شي يا د يار له غمه ځينه

څوک په رضا له ملکه نه ځي
يا ډير غريب شي يا د يار له غمه ځينه

څوک په ټوډي موټر کې ګرځي
څوک د کرې لپاره بل ته سوال کوینه

څوک چې د يار په غېږ کې پروت وي
په نورو خلکو د ړندو ګومان کوينه

څوک چې د ښکلو وفا غواړي
ماته کيسه د صنوبر راياده شينه

څوک چې عاشق شي ملامت شي
د ملامتو مرستې هيڅ څوک نه کوينه

څوک چې په شنو سترګو مين شي
پس د ماښامه دې پنځډزی ګرځوينه

څوک چې په چا باندې مين شي
هغه غمجن شي د هر چا د خندا شينه

څوک یې مړوند باندې اوده شي
څوک یې د یو نظر کتو په ارمان وینه