بدلون؛ د یوه لوري نه، د ټول ملت مسؤلیت

بدلون یوازې د یوه نظام یا یوې ډلې مسؤلیت نه دی؛ بلکې د ټولنې د ټولو وگړو گډ مسؤلیت دی. لوستي کسان، استادان، متخصصین، سوداگر، پانگه وال، ځوانان او د ټولنې نور قشرونه باید خپل رول ولوبوي او د اصلاح او پرمختگ لپاره عملي هڅې وکړي.

بدلون د زور، توپک او تاوتریخوالي له لارې نه، بلکې د پوهاوي، سالمو خبرو، رغنده نقد او د منلو وړ ارزښتونو د ترویج او عملي کولو له لارې ، چې د ټولنې یو والی او استحکام هم وساتل شي، رامنځته کېږي. د حق غږ باید پورته شي، خو په داسې طریقه چې د ټولنې د اصلاح او ثبات سبب وگرځي، نه د جنگ او د بحران.

همدارنگه، بدلون یو دوامداره او تدریجي پروسه ده. دا حوصله، پرله‌پسې هڅې او وخت غواړي. تر ټولو لومړی باید زموږ په فکرونو او چلند کې مثبت بدلون راشي، او بیا د وخت، شرایطو او موجودو امکاناتو په چوکاټ کې واقع‌بینانه غوښتنې مطرح کړو، کوم چې ټولنې ته قابل د هضم وي او پردیو ته د مداخلې اسباب برابر نکړي.