هسې خو  نه ما بل بشر ونه ليد بيا هغسې
ما د چا سترګو کې اثر ونه ليد بيا هغسې

ته پرې راتلې چې ترې راتلې به د لونګو وږمې
تر تا مې وروسته پورې غر  ونه ليد بيا هغسې

څنګه سپېره سپېره بيا وروسته نصيبونه د وخت
په شنه اسمان مې زېړی لمر ونه ليد بيا هغسې

چې ترې زما مړي ژوندون به د ژوند سا اخيسته
ولاړ اشنا مې په کنډر  ونه ليد بيا هغسې

زه دې کوڅه کې تېرېدم به چې نيمکښی به شو
قسم دی هيڅ مې هغه ور ونه ليد بيا هغسې

چې د منګيو او بنګړيو شور ترې کډه وکړه
چا په دې بر ګودر محشر  ونه ليد بيا هغسې

هسې اشنا چې ستا د هجر په شپه ما ليدلی
ما  بېکسيار  هسې اوتر  ونه ليد بيا هغسې