ډېر سره لرې يو موږ  ډېر سره نزدې کړې خدايه
زما په اوښکو د جانان سترګې لندې کړې خدايه

زړۀ د هر ښکلي د هغه د مخ په شانې سپين کړې
د ښيښو شاته دغه کاڼي هم ښيښې کړې خدايه

په خپلو اوښکو بېرته ووينځو رانجه د سترګو
زموږ په هره ښادي غم ولې پسې کړې خدايه

چې يبلې پښې ځي له وطنه، د هغو دپاره
د ګل تر پاڼو د اغزو څوکې پستې کړې خدايه

چې د دروېش د زړه تر کاڼي پورې ووري وزي
د بڼو څوکې دې د يار څومره پستې کړې خدايه

۲۴/دسمبر/۱۹۹۷ ز