له خدایه غواړمه ډېر کم وخت ته له سره ځواني

خو چې بې خوفه وي او پاکه له خطره ځواني

وې توپانونو ته ولاړ " اوس دې سیلۍ غورځوي

ښایي په تا باندې هم تېره شوله ' وره ' ځواني

بازه!  که ته رانه هرڅو خپل عمر پټ وساتې

مالوموم دې په الوت کې له وزره ځواني

نه جونو خوښ کړې ' نه یې ښکل کړې ' دواړه مخه باندې

بدرنګه!  تېره دې کړه هسې بې ثمره ځواني

مغرور  زلمي یې کړي خدمت او غلامي یې کوي

دا بوډاتوب هم لږ څه ښه دی ' خو اکثره ځواني

تمامه شپه په ویښه تېره کړي په مخ د ګلاب

شوګیرشبنم ' ساتلی نه شي بیا د لمره ځواني

دنیا دې راوړه مګر دا تاوان دې هم کړی دی

کور ته دې رانوړه ساېره!  له سفره ځواني