افغان اتلان · ادب او کلتور
پښتو شعرونه
د پښتو شاعرانو نړۍ ته ښه راغلاست
299 شاعران4249 شعرونه
غزل
بیل موږ شو او په سر مو شوه ګنا د دېوالونو
تۀ نه اورې؟ زۀ اورمه ژړا د دېوالونو
د زړۀ د مینې لمر مي ؤ ډېر پورته خو تر عرشه
سرونه لګېدل ستا د کلا د دېوالونو
تا دلته دي خندلي یوځل تاته یې کتلي
درز درز مي ده د خونې هره خوا د دېوالونو
زۀ دغه شېبه ژوند ګڼم، راتلونکې شېبه مرګ دی
تۀ سوچ کوه همداسې په دریا د دېوالونو
ما ستاد راتګ ځان سره وعده تکراروله
زۀ کوڼ کړمه په ځان پورې خندا د دېوالونو
تۀ غواړې چي د زړه په ورین ورغوي کي مي شین شې؟
تۀ غواړې بنیاد کېږدې په هوا د دېوالونو ؟
باران کي چي لامده شي،هو هو هغه،بلکل، هغه
د عطرو دوکانداره!خوشبو را د دېوالونو
حیران یمه ایثاره! د خپل سات کمزوري ستن ته
شېبه شېبه مي اړوي سا سا د دېوالونو