افغان اتلان · ادب او کلتور
پښتو شعرونه
د پښتو شاعرانو نړۍ ته ښه راغلاست
299 شاعران4249 شعرونه
د ميني درود
نور خوښيو كډه كړې بس غمونه مېلمانه دي
د ژوندون په مېلمستون كي مو مرګونه مېلمانه دي
نه د ميني درود پر شونډو نه د حسن غلامي سته
په وطن كي مو بېځايه رواجونه مېلمانه دي
نه سيتار نه سارنګۍ سته نه د زركو اوازونه
د ژوندون په هر پړاو كي مو اهونه مېلمانه دي
زلزلې او كه توپان وي بيا به ټوله ما ته هيڅ وي
اوس د ميني پر كاله مي ماښامونه مېلمانه دي
موږ خو وايو چي سهار دى خو تيارو كي لا ويده يو
د وطن پر زرين هسك مو تندرونه مېلمانه دي
۷/ ۱۲/ ۱۳۷۸ كندهار