افغان اتلان · ادب او کلتور
پښتو شعرونه
د پښتو شاعرانو نړۍ ته ښه راغلاست
299 شاعران4249 شعرونه
غزل
اى مړ پکې له ټولو نه اول دى دا څه چل دى
جګړه ده د پښتون پکې اجل دى دا څه چل دى
د تور ټوپک کارتوس د روپۍ لس پکې خرڅيږي
او يو قلم په دې ښارکې په سل دى دا څه چل دى
غازي پکې خاين او د پردو خلکو مزدور دى
بوتل په دغه خاوره کې آتل دى دا څه چل دى
په جنګ کې يې لقب د قهرمان هر ځاى ګټلى
په سائينس کې په درنه تېږه تمبل دى دا څه چل دى
له مخې شاعران دي څوک سنګر څوک زلفې ستايي
د هر سړي په خله باندې غزل دى دا څه چل دى
توبه چې يې پيسې له بيت المال نه پټولې
ولاړ اوس پارلمان ته هغه غل دى دا څه چل دى
عجيبه ده هيڅ زړه راباندې نه خوږوي خدايه
چې وژنې مې هغه سړى مې خپل دى دا څه چل دى
صميمه د چا لاس او د چا پښې پکې پرتې دي
په وينو باندې سور مړه کابل دى دا څه چل دى