افغان اتلان · ادب او کلتور
پښتو شعرونه
د پښتو شاعرانو نړۍ ته ښه راغلاست
299 شاعران4249 شعرونه
غزل
نه مې جهاد وکړو او نه مې غنیمت راوړۀ
خو بیا مې هم وطن ته زیری د جنت راوړۀ
هغه نغمه د اویا حورو او جنت راوړه
ما د انسان د بربادیو حکايت راوړۀ
له ځانه دوه قدمه لیرې عجیبه حال وو
یو سړي ځان خرڅوه بل ورته قیمت راوړۀ
تا نه رخصت شومه او څومره بې نوا راغلم
نه مې ستائنه راوړه نه مې شکايت راوړۀ
ما سره څه وو، ما لفظونه او خپل زړه راوړل
چا به رتبه چا به شهرت چا به دولت راوړۀ
ما پکې ستا د سپورو زلفو تذکره وکړه
ما په دعا کې توسل د محبت راوړۀ
د خاورې رنګ د ګل خوشبو مې په لهجه کې ده
صابره ما په نوي رنګ کې روايت راوړۀ