څه چی په زړه می دي په خوله نه راځي

لکه په للمه چی اوبه نه راځــــــــــــــــــي

ستا په مسکئ مسکئ خندا تيروتـــم

اوس نو پښتو ده چل د نه نه راځــــــــي

تاسی د ښار ښکلو ته لوبئ ښـــــکاري

ځکه مو زړونو کی جذبه نه راځـــــــــــي

سپوږمئ هم ځان وريځو کي ونغاړلــــو

اوس روڼ اسمان او هغه شپه نه راځــــي

د بيوفا جانان د ظلمه ځنـــــــــــــــــــــــــــي

نم مي د سترګو تر ليمه نه راځـــــــــــــــي

نن مو په مينه باندی ټول خــــــــــــبر دي

هلمند شيرزاد ته اوس بهانه نه راځــي

2010/09/18  مالمو سویډن