لږ تم شي او را وګوري او لاس په لاس کې راکړي
خوږه مینه عجیب د ژوند احساس په لاس کې راکړي

یو څوک راشي له ورایه په خندا شي لکه ګل
د نور له اداګانو جوړ الماس په لاس کې راکړي
 
ناصح د دین له آره بې خبره یو ساتلي
د خېټې له تعبیره جوړ لباس په لاس کې راکړي

د نن ورځې سیاست او بازار دواړه چل او فریب دي  
ښې ډېرې روپۍ واخلي لږ اجناس په لاس کې راکړي 

شیطان او دا کافر ملا خو دواړه سره یو دي
دا یو واخلي ایمان او بل وسواس په لاس کې راکړي

کماله خوند د مینې د غزل به شي دوه چنده
که واګې خدای د شعر د ښکلي آس په لاس کې راکړي