افغان اتلان · ادب او کلتور
پښتو شعرونه
د پښتو شاعرانو نړۍ ته ښه راغلاست
299 شاعران4249 شعرونه
یم کمزوری له تا لیرې ځم انسانه
اوس مې زړه دچا لپاره نه درزېږي
اوس دچا له غمه ویښ ټوله شپه نه یم
اوس دچا په انتظار کې ستړی نه یم
اوس ژړاوې راته مکر غوندې ښکاري
اوس مې زړه دچا ښکلا لړزوی نه شي
په کې ٍ(خو)له ډېره لیرې راته ښکاري
اوس بې غمه سترګې پټې کړم، ويده شم
تر سهاره هیڅوک نه راځي په خوب کي
***
په ماڅه که دبلبلو اوښکې څاڅي
په ماڅه که مرغۍ ګرځي بې وزرو
په ما څه که میر دزاڼو یې وژلی
په ما څه که الوت نه شته دکوترو
له ښکاري سره اوس زه په یوه نظر یم
زرکې ښکلې نه دي،غوښې یې خوږې دي
زه خو ځمه،لنډې لارې لټومه
زما یې څه که لارې شنې ،که تکې سرې دي
په ما څه که له بوډۍ ده لاره ورکه
په ما څه که بوډا ولوېده په ځمکه
په ما څه که یې امساء ترې اوړکو یوړه
څه خبر یم په چا ولوېدله ټکه
په ما څه که دسوالګر کچکول لوېدلی
په ما څه که رویو سپیو دی داړلی
احساسات دي رانه لیرې تښتېدلي
عواطف مې له خپل ذهن نه مینځلي
اوس غمونه مصنوعي راته ښکارېږي
اوپردۍ ټولې خوښي راته ښکارېږي
ښاپېریانې له دیوانو سره ناڅي
فرښتې ابلیس ته وايي راته ګرانه
اوس په هیچا اعتبار کولی نه شم
زه یم نوی راستون شوی له خپل ځانه
دافکارو په ځنګله کي لاره باسم
یم کمزوری ،له تا لیرې ځم انسانه
اوس مې زړه لکه چې نه شته ،خبر نه یم
او که وي ،ټوټې-ټوټَې به چېرې پروت وي
تا یې وانه ورېد اواوز دماتېدلو
ستا وروستۍ خبرې دومره اثري وې
۲۴ /۳ /۱۳۸۴ کابل ـ څارندوی مېنه