ورځـــم کــــوم يــــار تــــه منــــت چــې چاړه را کاږي نور
ژوندون ته څه مـــې ضــــرورت چې چـــاړه را کاږي نور

راغلم ختيز ته تر لوېـــديـــزه انــــسان ومـــې نـــه مـوند
له انسانيـــته مــــې نـــفــــرت چــــې چـــاړه را کاږي نور

راته تر څــــو بــــه وخـــــت ايـــستلې تــــوره سرته ولاړ؟
درېغه چـــې وکــــړي دا همــــت چـــې چاړه را کاږي نور

خيال خو مې نه شي چې به يــار لـــه قصده نه مې وژني
که داسې وي هم له غفلت چـــې چـــــاړه را کــــاږي نــور

ورشـــه ريــــباره يـــــار تـــــــه و رســـــوه دغـــــه پيــــغام
تېــــــر يـــــې لــــه ميــنې له الفت چې چاړه را کاږي نور

پــــه واټــــنونــــــو رانـــــه لـــــــرې يـار سره مې نور څه؟
ورځـــم يــــواځــــــې پـــه دې نيت چې چاړه را کاږي نور

ما بېکسيار خــــون ور بخــښلى اوس رقيب که نر شي
او يــــوڅــــــه وکــــړي جـــرئـــت چــې چاړه را کاږي نور