ابو الفتحه! سر که پورته

ميوندي! قلم را واخله

اې محموده! را ولاړ سه

د بري علم را واخله

احمد شاه! سترگي که روڼي

ذوالفقار دي سم را واخله

ميرويس خانه! زموږ خوا ته

په الطاف قدم را واخله

مگر ستاسي روح په موږ کي، د ژوندون احساس پيدا کړي

بيا د علم جنډې لوړي، پښتون قام نشو و نما کړي

اې شير شاهه! يوار گوره

له سهسرامه و دې خوا ته

اې خوشحاله ! نظر وکړه

پښتون پروت دي خوا و شا ته

د مهمند و نام ورو

چي مو علم کي را زياته

د پښتون قام مشرانو

تاسي لاړاست موږ يو پاته

نن خو ستاسي کار نامې دي، چي به زموږ د ژوند اساس وي

که مو دا لاره کړه ټينگه، نو پښتون به ضرور پاس وي